សៀមរាប៖ អភិបាលខេត្តព្រះសីហនុ លោក គួច ចំរើន បានឱ្យដឹងថា ដើមឆ្នាំ២០២៤នេះ មាននាវាទេសចរណ៍សរុប ១០គ្រឿង ដឹកភ្ញៀវ និងបុគ្គលិកជាង ១៣ពាន់នាក់ ចូលចតកំពង់ផែស្វយ័តក្រុងព្រះសីហនុ។

លោក គួច ចំរើន លើកឡើងដូចនេះលើបណ្តាញសង្គមលោកផ្ទាល់អមជាមួយរូបភាពនាវាទេសចរណ៍ នាថ្ងៃទី២២ ខែកុម្ភៈ ឆ្នាំ២០២៤។ លោកថា៖ «ដើមឆ្នាំនេះ មាននាវាទេសចរណ៍ ចំនួន ១០គ្រឿងហើយ បានដឹកភ្ញៀវ និង បុគ្គលិកជាង ១៣ពាន់នាក់ ចូលចតកំពង់ផែព្រះសីហនុ»។

គួរឱ្យដឹងដែរថា នាព្រឹកថ្ងៃទី២២ ខែកុម្ភៈ ឆ្នាំ២០២៤នេះ មាននាវាទេសចរណ៍មួយគ្រឿងឈ្មោះ SEABOURN ENCORE បានចូលចតនៅកំពង់ផែស្វយត័ក្រុងព្រះសីហនុ ដោយមានចំនួនភ្ញៀវទេសចរសរុប ៥៦១នាក់ ខណៈនាថ្ងៃទី២១ ខែកុម្ភៈ ឆ្នាំ២០២៤ មាននាវាទេសចរណ៍មួយគ្រឿងឈ្មោះ LE JACQUES CARTIES បានចូលចតនៅកំពង់ផែស្វយត័ក្រុងព្រះសីហ ដោយមានចំនួនភ្ញៀវទេសចរ ១៥១នាក់ និងនាវិកចំនួន ១២១នាក់ផងដែរ។

ក្នុងខែកុម្ភៈ ឆ្នាំ២០២៤ គិតត្រឹមថ្ងៃទី២២នេះ មាននាវាទេសចរណ៍សរុបចំនួន ៧គ្រឿង និងនាវាកងស្វ័យការពារជើងទឹកជប៉ុន ២គ្រឿង បានចូលចតដល់កំពង់ផែស្វយ័តក្រុងព្រះសីហនុ៕